حبيبي القاسي ـــــ أسد الشعر العربي ( جمال الشرقاوي ) قصيدة - حبيبي القاسي - شعر الشاعر - جمال الشرقاوي -

حبيبي القاسي ـــــ
أسد الشعر العربي ( جمال الشرقاوي )
قصيدة - حبيبي القاسي -
شعر الشاعر - جمال الشرقاوي -




أصبُر عليه بكرة
و لا عليه بعده
إيه اللي كان يجرىَ
لو م التقاش وعده
مال الجميل تقلان و متغيَّر
ماله مداري عيونه
قمر الليل اللي بينوَّر
و اديني صابر علىَ عيونه
و صابر على جراح رموشه
عايش على حرماني
عايش على كتماني
صابر على قلبُه مهما
على قلبي يتأمَّر
يمكن يجي ف يوم
و ينسىَ أساه
يمكن يجي ف يوم
و يخونه جفاه
و لا تخونه الحياه
زي م خان وعدي
و نسِي صبري عليه
و ضيَّع هوايا ويَّاه
أنا هستنىَ يا قلب لقاه
مهما يطوِّل و يبعد عني
هصبَّر قلبي بالحب دواه
مهما الحبيب يلاوعني
مهما يطير و يغيب ف فضاه
يا مين ف حبه يحاربني
بكرة يجيني و انا صابر
و انا حاير
و مش هسلاه
و لا هنساه
و لا هقوله ف يوم بكيت
لمَّا عن عيون قلبي تاه
و لا هقوله أنا غنيِّت
و انا ماشي ف مكان ذكراه
و لا هعاتبه
و انا حبيبه
ف يوم فرحه
و ف يوم بكاه
ف يوم هجره
و ف يوم رؤاه
بس يرجع حبيبي اللي طار
يرجع دة عش هوانا احتار
هو قدري هو أملي
و غيره م اقدرش اختار
مال الجميل تقلان و متغيَّر
ماله مداري عيونه
قمر الليل اللي بينوَّر
أصبُر عليه بكرة
و لا عليه بعده
إيه اللي كان يجرىَ
لو م التقاش وعده



القاهرة - 13 - 2 - 1989 م
جمال الشرقاوي - كاتب و شاعر